Vémonos «At Home»

Nace At Home, en Anceu Coliving

Anceu é un fogar. Un fogar que constrúen as persoas que o habitan. At Home existe para que a xente poida formar parte del: coa súa arte, a súa creatividade e o seu deseño. Grazas a iso, Anceu Coliving pode ser tamén un centro de arte e cultura.

Queremos a túa visión de Anceu. At Home proponche que interpretes Anceu e os seus valores desde a túa perspectiva. Forma parte.

E no noso fogar, os nosos valores son:

• Impacto social. O rural ensínanos moitísimo. Devolvémoslle o que sabemos en forma de talento, ideas e posibilidades.
• Inspiración. Construímos un fogar de talento. Aprendemos de todo o mundo, estea onde estea.
• Facemos todo con algo de tecnoloxía, pero quedamos coa parte que nos cambiou a vida.
• Responsabilidade. Non hai un planeta B. A comunidade de Anceu coídao desde a aldea.
• Modo lento. Case nada na vida é urxente. Vivimos xuntos en calma e harmonía para poder evolucionar sendo flexibles.
• Somos persoas imperfectas. Por iso queremos mellorar sempre. Facemos o que podemos co que temos.
• Perspectiva. Sabemos que hai mil formas de ver calquera cousa, así que achegamos visións distintas e construímos con elas.

Quen pode sumarse a At Home?

Xente do sector artístico: pintoras, deseñadores, arquitectas, artesáns. Este proxecto arranca con mulleres como protagonistas porque, si, somos un espazo feminista.

Como se fai?

Ven, coñece o espazo. Visita o noso fogar e inspírate. Escolle a zona na que queres intervir.

A partir da túa idea, o equipo de At Home (o equipo de Anceu e María, de Dr. Living Home) axúdache a executala.

E eu que gaño?

At Home ofréceche:

• Unha estadía gratuíta dunha semana ao ano para vivir na túa obra.
• Anceu como o teu coworking gratuíto durante un ano.
• Máis visibilidade nas nosas redes e no noso espazo.
• Coñecer a xente da comunidade de Anceu.
• Participar nos nosos encontros de arte e creatividade en Anceu.

O equipo de At Home

Desde que fundamos Anceu en 2020, este sitio leva a pegada da nosa deseñadora María, de Dr. Living Home. Convivimos desde entón. Ensinounos o importante que é que cada recuncho teña personalidade, e tamén a gozar da satisfacción de facer coas mans. Con ela creamos At Home para seguir construíndo o noso fogar de forma colectiva.

Se queres participar, escríbenos a hello@anceu.com.

Algunhas habitacións redecoradas a través do proxecto At Home

O que veu despois: Vémonos «At Home»: a evolución