Alliances
Impacto local desde un coliving rural
Unha das ideas principais cando arranquei Anceu Coliving era crear impacto local nunha zona rural. Aínda que o tiven na cabeza desde o primeiro día, funo facendo pouco a pouco a través de distintas iniciativas.
A comunidade de Anceu Coliving e os veciños de Anceu colaborando nun proxecto artístico
Hai que entender que son galego, pero non son de Ponte Caldelas, o concello ao que pertence Anceu. Tiven que ir coñecendo a xente da zona paso a paso para ver onde podía axudar ou xerar impacto o coliving.
Cando coñecín as primeiras persoas da contorna, pregunteilles por iniciativas nas que puidese encaixar. Axiña coñecín a xente do Colectivo Arroutada e súmeime a unha actividade de retirada de eucaliptos. O eucalipto é unha especie non autóctona en Galicia que destroza a contorna. Tiven o pracer de acompañalos nesa actividade, xerar un pouco de impacto local e ampliar a miña rede social na zona.
Aquilo deu froitos. A xente da asociación puxome en contacto cun par de iniciativas que me axudarían no camiño de crear impacto local.
O grupo ecolóxico, Xavi o panadeiro e o invernadoiro de Cáritas
Colivers visitando o invernadoiro da ONG
A primeira iniciativa que coñecín foi un grupo ecolóxico local chamado Eco Lóxico, onde podes facer pedido dúas veces ao mes e tráenche produtos ecolóxicos. Así que unha das cousas que Anceu ofrece a quen queda aquí é poder pedir a través do grupo ecolóxico.
A xente de Eco Lóxico presentoume aos responsables de Cáritas, que ten un invernadoiro en Ponte Caldelas. Aí producen con técnicas de permacultura e venden directamente a quen consome, así que os engadín á lista de provedores locais do coliving.
Ademais do invernadoiro, a xente de Eco Lóxico puxome en contacto con Xavi. Xavi e a súa parella Alba levan unha panadería incrible, Obradoiro Compañeira, con moita variedade de pan e bolería ecolóxica. Reparte unha vez á semana, e calquera membro da comunidade de Anceu pode pedirlles pan caseiro.
Rosabel, a que o arranxa todo
De esquerda a dereita: Pedro, Rosabel, Se e África
O día que negociei o sitio para Anceu tiven o pracer de coñecer a Rosabel. Pensei que tiña que ser ela quen me axudase coa casa e a asentarme na aldea. En canto abrín, contrateina.
Foi unha das partes máis importantes do coliving e da comunidade. Non houbo ninguén que quedase en Anceu que non teña palabras marabillosas para ela. É simplemente a mellor.
Ademais da súa amabilidade, a súa atención ao detalle e de tratarme coma un fillo, puxome en contacto con xente que fai moito máis doado o día a día do coliving. Unha desas persoas é María, a peixeira. Grazas a Rosa, en Anceu podemos escribirlle a María para que nos traia peixe fresco calquera día da semana.
Visibilidade grazas a Andrés Díaz, alcalde de Ponte Caldelas
Andrés Díaz, alcalde de Ponte Caldelas, nun dos eventos de Anceu Coliving
En xullo de 2020, e grazas a Rosa, o alcalde de Ponte Caldelas veu a Anceu dar a benvida a este novo negocio no concello. Grazas a esa visita e á visibilidade nas súas redes, apareceron Juan José, o taxista, e Laura, a masaxista, ofrecendo os seus servizos. Por iso, os colivers poden chamar a Laura para unha masaxe no coliving e contar con Juan José para ir e vir sen necesidade de coche.
Un espazo que usa a comunidade local
Ás veces non se trata de crear impacto, senón simplemente de estar aí para a comunidade. Neste caso, a local. Aínda que Anceu leva menos dun ano, xa se me achegaron un par de grupos para usar o espazo.
Un deles é Batu Kaldelas, un grupo feminista de percusión do concello. Ademais da percusión, organizan actividades de pintura e baile. Precisaban un sitio, así que lles prestei encantado un dos espazos multiusos que temos.
A carta de Nadal
O Nadal pasado quería dar as grazas á veciñanza de Anceu polo ben que nos acolleron na súa aldea. Para iso, os colivers e mais eu escribimos unha carta e puxémola na aldea. En menos dunha semana xa se falaba dela, e déronme as grazas por mensaxe privada nas redes.
Un camiño que non se acaba
Anceu leva máis de seis meses aberto ao público e, na miña opinión, xa pasaron moitas cousas. Pero o impacto local precisa tempo: a min gústame describilo como unha maratón.
Que todo isto exista xa non significa que Anceu non teña que seguir traballándoo. Temos algunhas cousas en mente para os próximos meses e irémosvos contando.
E por suposto, se queres formar parte da comunidade de Anceu ou destas iniciativas de impacto local, escríbenos a hello@anceu.com.